து³ஷ்டதூ³ரா து³ராசாரஶமநீ தோ³ஷவர்ஜிதா । ஸர்வஜ்ஞா ஸாந்த்³ரகருணா ஸமாநாதி⁴கவர்ஜிதா ॥ 51 ॥
ஸர்வஶக்திமயீ ஸர்வமங்க³ளா ஸத்³க³திப்ரதா³ । ஸர்வேஶ்வரீ ஸர்வமயீ ஸர்வமந்த்ரஸ்வரூபிணீ ॥ 52 ॥
ஸர்வயந்த்ராத்மிகா ஸர்வதந்த்ரரூபா மநோந்மநீ । மாஹேஶ்வரீ மஹாதே³வீ மஹாலக்ஷ்மீர்ம்ருட³ப்ரியா ॥ 53 ॥
மஹாரூபா மஹாபூஜ்யா மஹாபாதகநாஶிநீ । மஹாமாயா மஹாஸத்த்வா மஹாஶக்திர்மஹாரதி꞉ ॥ 54 ॥
மஹாபோ⁴கா³ மஹைஶ்வர்யா மஹாவீர்யா மஹாப³லா । மஹாபு³த்³தி⁴ர்மஹாஸித்³தி⁴ர்மஹாயோகே³ஶ்வரேஶ்வரீ ॥ 55 ॥
மஹாதந்த்ரா மஹாமந்த்ரா மஹாயந்த்ரா மஹாஸநா । மஹாயாக³க்ரமாராத்⁴யா மஹாபை⁴ரவபூஜிதா ॥ 56 ॥
மஹேஶ்வரமஹாகல்பமஹாதாண்ட³வஸாக்ஷிணீ । மஹாகாமேஶமஹிஷீ மஹாத்ரிபுரஸுந்த³ரீ ॥ 57 ॥
சது꞉ஷஷ்ட்யுபசாராட்⁴யா சது꞉ஷஷ்டிகலாமயீ । மஹாசது꞉ஷஷ்டிகோடியோகி³நீக³ணஸேவிதா ॥ 58 ॥
மநுவித்³யா சந்த்³ரவித்³யா சந்த்³ரமண்ட³லமத்⁴யகா³ । சாருரூபா சாருஹாஸா சாருசந்த்³ரகலாத⁴ரா ॥ 59 ॥
சராசரஜக³ந்நாதா² சக்ரராஜநிகேதநா । பார்வதீ பத்³மநயநா பத்³மராக³ஸமப்ரபா⁴ ॥ 60 ॥